राज्य सेवा परीक्षेचा निकाल जाहीर

354 उमेदवारांची निवड; कुणाल पाटील राज्यात प्रथम

पुणे (प्रतिनिधी) ः महाराष्ट्र लोकसेवा आयोगामार्फत राज्य सेवा मुख्य परीक्षा 2013 चा अंतिम निकाल नुकताच जाहीर झाला आहे. गट "अ'च्या 138 व गट "ब'च्या 216 अशा एकूण 354 राजपत्रित अधिकाऱ्यांची रिक्त पदे यातून भरण्यात येणार आहेत. धुळे जिल्ह्यातील देवपूरचे कुणाल मनोहर पाटील या परीक्षेत राज्यात प्रथम आले असून, त्यांची सहायक विक्रीकर आयुक्त (गट अ) पदी निवड झाली आहे.

मागासवर्गीय वर्गवारीतून वालचंदनगर (पुणे) येथील कृषी अभियांत्रिकी पदवीधर श्रीनिवास महादेवराव अर्जुन, तर महिला वर्गवारीत अमागास (ओपन) गटातून पाथरी (परभणी) येथील क्रांती काशिनाथ डोंबे प्रथम आल्या आहेत. दोघांचीही उपनिबंधक सहकारी संस्था (गट अ) पदी निवड करण्यात आली आहे.

अमरावती महसूल विभागातून 19, औरंगाबाद विभागातून 66, कोकणातून 29, नागपूरमधून 12, नाशिकमधून 28, तर पुणे महसूल विभागातून सर्वाधिक 200 उमेदवारांची निवड झाली आहे. यापैकी 86 उमेदवार पदव्युत्तर पदवीधारक आहेत. सर्वाधिक 75 उमेदवार वैद्यकीय शाखेचे पदवीधर असून, 63 उमेदवार अभियांत्रिकी पदवीधर आहेत. निवड झालेल्या उमेदवारांत 106 महिला व सात अपंग उमेदवारांचा समावेश आहे.

या भरतीप्रक्रियेसाठी मुंबईसह राज्यातील 33 जिल्हा केंद्रांवर 18 मे 2013 रोजी पूर्व परीक्षा घेण्यात आली. राज्यभरातील दोन लाख 85 हजार 643 विद्यार्थ्यांनी ही परीक्षा दिली. त्यातून चार हजार 342 उमेदवार मुख्य परीक्षेसाठी पात्र ठरवण्यात आले. या उमेदवारांची मुख्य परीक्षा 26 ते 28 ऑक्‍टोबर 2013 दरम्यान झाली. यातील एक हजार 97 उमेदवार मुलाखतीसाठी पात्र ठरले होते. गेल्या 6 ते 23 जानेवारीदरम्यान या उमेदवारांच्या मुलाखती झाल्यानंतर आता अंतिम निवड यादी जाहीर झाली आहे. लोकसेवा आयोगाच्या संकेतस्थळावर उमेदवार निवडीची सविस्तर यादी प्रसिद्ध करण्यात आली आहे.