कृषी अधीक्षक, सेवक, लिपिक परीक्षेचा निकाल जाहीर

969 उमेदवारांची निवड; माजी सैनिकांअभावी 101 पदे रिक्त

पुणे (प्रतिनिधी) ः कृषी विभागामार्फत नोव्हेंबरमध्ये घेण्यात आलेल्या कृषी सेवक, सहायक अधीक्षक, वरिष्ठ लिपिक व कनिष्ठ लिपिक यासाठीच्या 1070 रिक्त पदांच्या भरती परीक्षेचा निकाल नुकताच जाहीर झाला आहे. यापैकी 969 पदांसाठी उमेदवारांची निवड करण्यात आली असून, उमेदवारांअभावी माजी सैनिकांची 101 पदे रिक्त राहिली आहेत. कृषी विभागाच्या संकेतस्थळावर वरील पदांसाठी निवड झालेल्या उमेदवारांची विभाग व प्रवर्गनिहाय यादी प्रसिद्ध करण्यात आली आहे. या भरतीसाठी 5 जून 2013 रोजी जाहिरात प्रसिद्ध होऊन 23 नोव्हेंबर 2013 रोजी लेखी परीक्षा घेण्यात आली होती.

- हे आहेत "टॉपर'
कृषी सेवक ः भूषण दिलीप वाघ, औरंगाबाद व मुकेश भाईदास सोनवणे, नाशिक (प्रत्येकी 186 गुण)
सहायक अधीक्षक ः वर्षा रमेश चौधरी, नाशिक (186 गुण)
वरिष्ठ लिपिक ः प्रवीण राजधर चौधरी, मंदार नारायण म्हाडेश्‍वर, ठाणे (186 गुण)
कनिष्ठ लिपिक ः मनोज दगडू पाटील, नागपूर (191 गुण)

आठ दहा दिवसांत "ऑर्डर'
निवड झालेल्या उमेदवारांनी पदासाठी अर्ज करताना सादर केलेली माहिती व त्याबाबतची मूळ कागदपत्रे तपासून निवड झालेल्या उमेदवारांना नियुक्तीचे पत्र (ऑर्डर) देण्यात येणार आहे. संबंधित विभागीय कार्यालयामार्फत येत्या आठ दिवसांत ही कार्यवाही पूर्ण करण्याचे कृषी विभागाचे नियोजन आहे. हे पत्र हाती पडल्यानंतर तत्काळ किंवा जास्तीत जास्त एक महिन्याच्या कालावधीत उमेदवारांना नियुक्तीच्या ठिकाणी रुजू होता येईल.

...तर निवड रद्द
कृषी विभागाने जाहीर केलेली निवड यादी उमेदवारांनी सादर केलेल्या कागदपत्रांच्या तपासणीच्या आधीन राहून प्रसिद्ध करण्यात आली आहे. यानुसार पुढील आठ दिवसात संबंधित नियुक्ती प्राधिकाऱ्याकडून नियुक्तीपूर्वी आवश्‍यक मूळ कागदपत्रांची पडताळणी करण्यात येणार आहे. या पडताळणीत उमेदवार पात्र असल्यास नियुक्ती देण्यात येईल. पडताळणीत चुकीची अथवा खोटी माहिती आढळून आल्यास संबंधित उमेदवाराची निवड रद्द करण्यात येईल.

101 पद भरती "वेटिंग लिस्ट'मधून
या भरती प्रक्रियेत माजी सैनिक उमेदवार उपलब्ध न झाल्याने रिक्त राहिलेली कृषी सेवकांची 93 व कनिष्ठ लिपिकांची आठ पदे याच परीक्षेतील उमेदवारांच्या प्रतीक्षा यादीतून भरण्याचा प्रस्ताव असल्याची माहिती कृषी आयुक्तालयातील सूत्रांनी दिली. यासाठी जिल्हा सैनिक बोर्डाची परवानगी घेण्यात येणार आहे. बोर्डाच्या ना हरकत प्रमाणपत्रानंतर संबंधित प्रवर्गातील प्रतीक्षा यादीतून गुणानुक्रमे रिक्त पदे भरण्याचे प्रस्तावित आहे.
------------
सर्वाधिक रिक्त पदे विदर्भात
माजी सैनिक उमेदवारांअभावी सर्वाधिक 66 पदे विदर्भात रिक्त राहिली आहेत. कृषी सहायकांची नागपूर विभागात 40 अमरावती विभागात 20, नाशिकमध्ये 12, ठाण्यात 10, पुणे विभागात 6, तर औरंगाबादमध्ये 5 पदे रिक्त आहेत. कनिष्ठ लिपिक संवर्गातील नागपूरमध्ये सहा तर कोल्हापूर व ठाण्यात प्रत्येकी एक पद रिक्त राहिले आहे.
------------
विभागनिहाय निवड पुढीलप्रमाणे
कृषी सेवक (एकूण 763) ः नागपूर 247, अमरावती 150, नाशिक 115, औरंगाबाद 75, पुणे 89, ठाणे 87
लिपिक (एकूण 149) ः नागपूर 62, ठाणे 36, नाशिक 17, कोल्हापूर 15, आयुक्तालय 15, पुणे 4
वरिष्ठ लिपिक (एकूण 39) ः नाशिक 14, नागपूर 8, पुणे 5, ठाणे 5, कोल्हापूर 4, लातूर 3
सहायक अधीक्षक (एकूण 12) ः नाशिक 3, ठाणे 3, कोल्हापूर 2, नागपूर 2, लातूर 1, पुणे 1
------------(समाप्त)--------------