मॅटचा निर्णय एमपीएससीच्या खुंटीवर

वन सेवा पूर्व परिक्षा २०१४

- महिना उलटूनही सुधारीत निकाल प्रलंबीतच
- विद्यार्थ्यांचा पुन्हा न्यायालयात जाण्याचा इशारा

पुणे (प्रतिनिधी) - महाराष्ट्र प्रशासकीय न्यायाधिकरण (मॅट) च्या निर्णयानुसार महाराष्ट्र लोकसेवा आयोगाने (एमपीएससी) महाराष्ट्र वनसेवा पूर्व परिक्षा २०१४ चा सुधारीत निकाल व वनसेवा मुख्य परिक्षेची तारिख लवकरात लवकर जाहिर करावी, अशी मागणी वसंतराव नाईक मराठवाडा कृषी विद्यापीठातील विद्यार्थ्यांनी केली आहे. येत्या १० जून पर्यंत एमपीएस्सीने निकाल जाहिर न केल्यास या प्रकारणी पुन्हा न्यायालयात जाण्याचा इशारा विद्यार्थ्यांनी दिला आहे.

सचिन खुणे व इतरांनी मॅट मध्ये दाखल केलेल्या याचिकेवर २८ एप्रिल रोजी झालेल्या सुनावणीत एमपीएस्ससी ला वनसेवा पूर्व परिक्षेतील निकालात बदल करुन मुख्य परिक्षेसाठी उत्तीर्ण विद्यार्थ्यांचे प्रमाण १ः१० एेवजी १ः२० करण्याचा आदेश देण्यात आला. या आदेशास महिना उलटल्यानंतरही अद्याप एमपीएस्सीने सुधारीत निकाल जाहिर केलेला नाही. मॅटच्या निर्णयामुळे वाढलेली विद्यार्थ्यांची संख्या, त्यांचे निकाल व वनसेवा मुख्य परिक्षेचा निकाल एमपीएससीने प्रसिद्ध केलेलानाही. यामुळे संभ्रमाचे वातावरण झाले असून पुढील परिक्षांचे नियोजनही बिघडल्याचे विद्यार्थ्यांचे म्हणणे आहे.

महाराष्ट्र वन सेवा पूर्व परिक्षा २०१४ गेल्या वर्षी घेण्यात आली. या परिक्षेत प्रश्नपत्रिकेच्या माध्यमामुळे वादाची परिस्थिती निर्माण झाली होती. यानुसार एक विशेष बाब म्हणून फक्त या परिक्षेसाठी १ः१० एेवजी १ः२० पट उमेदवारांना मुख्य परिक्षेसाठई पात्र ठरविण्याचा निर्णय आयोगाने घेतला आहे. हा निर्णय प्रसिद्ध करण्यापुर्वी आयोगाच्या कार्य नियमावलीत सुधारणा करणे आवश्यक आहे. ही सुधारणा तीन ते चार आठवड्यात करुन पूर्व परिक्षेचा निकाल सुधारित करुन प्रसिद्ध करण्यात येईल व त्यानुसार संबंधीत उमेदवारांना कळविण्यात येईल, असे लेखी आश्वासन आयोगाचे उपसचिव शु. स. परब यांनी मॅटला दिले होते. मात्र हे आश्वासन देवून महिना उलटल्यानंतरही अद्याप याबाबत निर्णय घेण्यात न आल्याने विद्यार्थ्यांमध्ये चिंतेचे वातावरण आहे.
---------------(समाप्त)-------------