खरिप विम्याचे १६०० कोटी शासन आदेशाच्या प्रतिक्षेत

पुणे (प्रतिनिधी) - गेल्या खरीपात विमा संरक्षण मिळविलेल्या शेतकऱ्यांना नुकसान भरपाई जाहिर होवून वीस दिवस आणि मंत्रीमंडळाने त्यासाठीच्या निधीला मान्यता देवून आठ दिवस उलटल्यानंतरही शासन निर्णयाअभावी राज्यातील ३५ लाख शेतकरी तब्बल एक हजार ६०० कोटी रुपयांच्या विमा भरपाईपासून वंचित आहेत. गेल्या खरिपाच्या नुकसानीची भरपाई या खरिपाच्या पेरणीसाठी उपयोगी ठरेल या आशेने शेतकरी अनेक महिन्यांपासून विमा लाभाच्या प्रतिक्षेत आहेत.

वित्त विभागाच्या मान्यतेअभावी अद्याप भरपाईची राज्य हिश्श्याची रक्कम उपलब्ध होऊ शकलेली नाही. याबाबतची फाईल मंत्रालयात प्रोसेसिंगमध्ये आहे, अशी माहिती कृषी मंत्रालयातील अधिकाऱ्यांनी दिली. वित्त विभागाकडून मान्यता मिळून शासन आदेश जारी झाल्यानंतर शेतकऱ्यांच्या बॅंक खात्यात भरपाईची रक्कम जमा होण्यास सुमारे चार ते सहा दिवसांचा कालावधी लागण्याची शक्यता आहे. राज्य शासनाकडून कृषी विभाग, कृषी विभागाकडून कृषी विमा कंपनी, यानंतर विमा कंपनीकडून बॅंकांना आणि सरते शेवटी बॅंकांकडून लाभार्थी शेतकऱ्यांच्या बॅंक खात्यात ही रक्कम जमा होणार आहे.

पिक विम्यासाठीचा केंद्राचा हिस्सा राज्य कृषी विभागाला प्राप्त झाला असून राज्याचा ६० कोटी रुपयांचा निधीही कृषी विभागाकडे उपलब्ध आहे. राज्य हिश्श्याची उर्वरीत रक्कम प्राप्त झाल्याशिवाय विमा भरपाईची रक्कम वितरीत करायची नाही, अशी भुमिका कृषी विभागाने घेतली अाहे. यामुळे उपलब्ध असलेल्या निधीच्या वितरणालाही अद्याप सुरवात करण्यात आलेली नाही. राज्याचा निधी उपलब्ध झाल्यानंतर एकत्रितपणे सर्व रक्कम वितरित करण्याची कार्यवाही सुरु करण्यात येईल, अशी माहिती कृषी विभागातील उच्चपदस्थांनी दिली.

- जिल्हानिहाय सहभाग व भरपाई (खरिप विमा २०१४)
जिल्हा --- संरक्षित क्षेत्र (लाख हेक्टर) --- सहभागी शेतकरी (लाख) --- लाभार्थी संख्या (लाख) --- भरपाईची रक्कम (लाख रुपये)
बीड --- ३.९८ --- ७.३३ --- ६.२९ --- ३३६५८.४७
जालना --- ३.२० --- ५.१६ --- ५.१२ --- १९०१५.५५
उस्मानाबाद --- ३.२२ --- ७.४७ --- ६.२५ --- १५७१३.१२
लातूर --- २.०८ --- ४.८७ --- ३.३७ --- १२७३९.३१
अकोला --- १.५४ --- २.१२ --- १.८० --- १०९२७.४३
परभणी --- १.४९ --- २.१६ --- २.०५ --- १०७४१.१५
बुलडाणा --- १.५५ --- १.८५ --- १.७५ --- ९१०१.४९
अमरावती --- १.१३ --- १.२२ --- १.१६ --- ८३९३.०१
यवतमाळ --- १.१० --- १.३२ --- १.२३ --- ७८९०.२६
औरंगाबाद --- ०.८६ --- १.३७ --- १.३० --- ७७८९.४०
नांदेड --- ०.८५ --- १.३९ --- १.३८ --- ७४४४.२७
वाशिम --- १.०३ --- १.४४ --- १.१९ --- ५७९९.८२
हिंगोली --- ०.४२ --- ०.६० --- ०.५८ --- ३९६७.८६
नगर --- ०.६८ --- ०.८७ --- ०.४० --- २१२७.०४
चंद्रपूर --- ०.८१ --- ०.६२ --- ०.३६ --- २०४४.३२
नागपूर --- ०.२० --- ०.१६ --- ०.०९ --- ५०६.९७
पुणे --- ०.१२ --- ०.१८ --- ०.०९ --- ३३९.१०
सोलापूर --- १.४४ --- १.७१ --- ०.११ --- ३२४.४४
नंदुरबार --- ०.०६ --- ०.१० --- ०.०५ --- २८५.१९
वर्धा --- ०.१३ --- ०.११ --- ०.०६ --- २५८.६७
नाशिक --- ०.१५ --- ०.२३ --- ०.०७ --- २२७.१८
धुळे --- ०.०९ --- ०.०९ --- ०.०४ --- ६५.२५
गडचिरोली --- ०.२६ --- ०.१८ --- ०.०१ --- ५८.९५
जळगाव --- ०.०५ --- ०.०४ --- ०.०१ --- ५४.१०
सांगली --- ०.६० --- ०.९२ --- ०.०४ --- ५२.४८
भंडारा --- ०.२१ --- ०.१६ --- ०.०२ --- ३७.०१
सातारा --- ०.५४ --- ०.८९ --- ०.०४ --- २.७२
कोल्हापूर --- ० --- ०.०१ --- ० --- ०.०१
गोंदिया --- ०.१८ --- ०.१३ --- ० --- ०
ठाणे --- ०.०९ --- ०.०८ --- ० --- ०
रायगड --- ०.०१ --- ०.०१ ---० --- ०