गुरुवारपासून राहूरीत ४३ वा जॉईंट ॲग्रेस्को

पुणे (प्रतिनिधी) - राज्यातील चारही कृषी विद्यापीठांच्या ४३ व्या संयुक्त कृषी संशोधन आणि विकास समिती बैठकीला (जॉईंट ॲग्रेस्को) येत्या गुरुवारपासून (ता.२७) महात्मा फुले कृषी विद्यापीठ राहूरी येथे प्रारंभ होत आहे. मुख्यमंत्री देवेंद्र फडणविस यांच्या हस्ते या बैठकीचे उद्घाटन होणार असून कृषीमंत्री एकनाथ खडसे अध्यक्षस्थानी असतील. कृषी राज्यमंत्री राम शिंदे व चारही विद्यापीठांचे कुलगुरु यावेळी उपस्थित राहणार आहेत. विद्यापीठांचे शंभरहून अधिक शास्त्रज्ञ विद्यापीठांनी गेल्या वर्षभरात केलेले संशोधन परिषदेत मान्यतेसाठी सादर करणार आहे.

विद्यापीठातील सेंटर आॅफ एक्सलन्स डाळींब प्रकल्प, भाजीपाला संशोधन केंद्राची इमारत व जॉईंट ॲग्रेस्कोच्या निमित्ताने भरविण्यात आलेल्या प्रदर्शनाचे उद्घाटन मुख्यमंत्र्यांच्या हस्ते यावेळी होणार आहे. विद्यापीठाच्या डॉ. नानासाहेब पवार सभागृहात संशोधन व विकास समितीची बैठक होईल. या बैठकीचा समारोप शनिवारी (ता.३०) सायंकाळी होणार आहे.