विदर्भात उष्मा वाढला

कमाल तापमानाचा पारा 42 अंशांवर; तुरळक ठिकाणी पावसाचाही अंदाज

पुणे (प्रतिनिधी) ः विदर्भात कमाल तापमानात एक ते दोन अंशांनी वाढ होऊन पारा 42 अंश सेल्सिअसपर्यंत उंचावला आहे. विभागात बहुतेक ठिकाणी पारा 40 अंशांहून अधिक आहे. याच वेळी ढगाळ हवामानात वाढ झाल्याने बुधवारी (ता.16) सकाळपर्यंत विदर्भ व मराठवाड्यात तुरळक ठिकाणी हलक्‍या स्वरुपाचा पाऊस पडण्याचा अंदाज हवामान खात्याने व्यक्त केला आहे. राज्यात अनेक ठिकाणी दुपारनंतर आकाश अंशतः ढगाळलेले राहण्याची शक्‍यता आहे.

विदर्भ आणि मराठवाड्यात हवेच्या खालच्या थरात कमी दाबाचा पट्टा सक्रीय आहे. यामुळे या दोन्ही विभागांसह राज्यात अनेक ठिकाणी आकाश अंशतः ढगाळलेले आहे. सोमवारी सकाळपर्यंतच्या चोविस तासात विदर्भात तुरळक ठिकाणी हलक्‍या स्वरुपाचा पाऊस पडला. ब्रम्हपुरी येथे सर्वाधिक एक मिलीमिटर पावसाची नोंद झाली. उर्वरित राज्यात हवामान मुख्यतः कोरडे होते.

कोकणाच्या काही भागात कमाल तापमानात सरासरीच्या तुलनेत किंचीत घट झाली आहे. उर्वरीत राज्यात कमाल तापमान सरासरीच्या जवळपास होते. राज्यात वर्धा येथे सर्वात जास्त 42 अंश सेल्सिअस कमाल तापमानाची नोंद झाली. राज्यात बहुतेक ठिकाणी किमान तापमानात सरासरीहून एक ते चार अंश सेल्सिअसने घट झालेली आहे.

राज्यातील प्रमुख ठिकाणी सोमवारी (ता.14) सकाळी साडेआठ वाजेपर्यंतच्या चोविस तासातील कमाल तापमान अंश सेल्सिअसमध्ये ः मुंबई 31, रत्नागिरी 33.2, पणजी 33.7, डहाणू 31.5, भिरा 40, पुणे 38.1, जळगाव 39.7, कोल्हापूर 37.9, महाबळेश्‍वर 31.5, मालेगाव 40.6, नाशिक 37.2, सांगली 37, सातारा 37.1, सोलापूर 40.5, उस्मानाबाद 38.9, औरंगाबाद 37.5, ुपरभणी 40, नांदेड 40.5, अकोला 40.8, अमरावती 39.8, बुलडाणा 39.2, ब्रम्हपुरी 40.3, चंद्रपूर 33, नागपूर 41.1, वाशिम 40, वर्धा 42, यवतमाळ 39.8
-------------(समाप्त)--------------