कृषी विभाग बदलणार संकेतस्थळ

ऍग्रो इफेक्‍ट
--------------
कृषी आयुक्तांचे आदेश; नवीन संकेतस्थळाचे काम सुरु

*चौकट
- असे आहेत प्रस्तावित प्रकल्प
राज्याचे ई प्रशासन धोरण 2011 मध्ये जाहिर झाल्यानंतर कृषी व पणन विभागाने महाकृषी संचार मोबाईल सेवा, किसान एसएमएस, ई ठिबक आज्ञावली, ई परवाना, क्रॉपवॉच, 1800-233-4000 हा टोल फ्री दुरध्वनी क्रमांक आदी सुविधा उपलब्ध करुन देण्यात आल्या आहेत. आता शेतकर्यांना विविध योजनांची माहिती कोणत्याही इंटरनेट कनेक्‍टीव्हिटीच्या शिवाय मोबाईलवर मिळण्यासाठी युएसएसडी प्रणालीचा वापर करण्याचा व विविध पिकांचे पॅकेज ऑफ प्रॅक्‍टीसेसची माहिती असणारे मोबाईल ऍप बनविण्यासाठीचा प्रस्ताव कृषी विभागाने माहिती तंत्रज्ञान विभागाला पाठविण्यात आला आहे.

पुणे (प्रतिनिधी) ः कृषी विभागाचे सध्याचे संकेतस्थळ ऑक्‍टोबर 2000 मध्ये विकसित करण्यात आलेले आहे. यामुळे संकेतस्थळात काही तांत्रिक तृटी आहेत. नवीन तंत्रज्ञानामुळे त्यात काही बदल करणे आवश्‍यक होते. त्यात आता फक्त काही सुधारणा करण्याऐवजी संपूर्ण संकेतस्थळच बदलण्याचे आदेश कृषी आयुक्त डॉ. उमाकांत दांगट यांनी दिले आहेत. यानुसार राष्ट्रीय सुचना विज्ञान केंद्राचे (एनआयसी) तांत्रिक संचालक गिरीष फेगडे यांच्या मार्गदर्शनाखाली नवीन संकेतस्थळ बनविण्याचे काम कृषी विभागाने हाती घेतले आहे. पुढील काही दिवसात हे नवीन संकेतस्थळ शेतकऱ्यांना उपलब्ध करुन देण्यात येणार असल्याचे कृषी विभागाने म्हटले आहे.

कृषी विभागाच्या सध्याच्या संकेतस्थळावरील माहितीही अद्ययावत करण्यात आलेली आहे. त्यात प्रशासन विभागात कृषी विभागाविषयीची माहिती, निविष्ठा विभागात खरीप व रब्बी 2013 आणि खरिप 2014 मधील बियाणे उपलब्धतेची माहिती आहे. बियाणे विषयक कायदे, प्रयोगशाळांची माहिती, खतांची सर्वसाधारण माहिती, खतांची उपलब्धता, कायदे, कमाल विक्री किंमत, किटकनाशक कायदे, प्रयोगशाळांची माहिती, सुविधा विभागात सर्व कृषी विद्यापीठांच्या व शेती संबंधीच्या विविध संकेतस्थळांच्या लिंक्‍स, प्रयोगशाळा, चिकित्सालये, शेतकरी प्रशिक्षण केंद्रांची माहिती देण्यात आली आहे. पर्जन्यमान, पिक पेरणी, कृषी गणना याविषयीची माहिती दररोज अद्ययावत करुन उपलब्ध केली जाते. सर्व योजनांची 2006-07 पासून 2014-15 पर्यंत वर्षनिहाय, संचालकनिहाय माहिती, मार्गदर्शक सुचना, शासन आदेश व शासन निर्णय उपलब्ध करुन देण्यात आल्याचा खुलासा कृषी विभागाने केला आहे.

लाभार्थी विभागामध्ये सुक्ष्म सिंचन अभियानातील लाभार्थी जिल्हा, तालुका व गावनिहाय पाहता येतील. यात शेतकर्याचे नाव, अर्ज क्रमांक, एकूण क्षेत्र, एकूण खर्च, दिलेले अनुदान याबाबतची सर्व माहिती उपलब्ध आहे. याशिवाय शेतकर्यांना आपला प्रस्ताव कोणत्या टप्प्यावर आहे याचीही माहिती मिळते. याशिवाय राष्ट्रीय कृषी विकास योजनेतील शेततळे लाभार्थींची यादीही उपलब्ध आहे. तंत्रज्ञान विभागात सर्व पिकांचे लागवडीपासून ते काढणीपर्यंतची माहीती, प्रतवारी, पॅकिंग, सेंद्रीय शेती, जैव तंत्रज्ञान, मृदा व जल संधारण उपचार याविषयीचे तंत्रज्ञान उपलब्ध करुन देण्यात आले आहे.

कृषी आयुक्तालयात दर मंगळवारी संचालकांच्या अध्यक्षतेखाली हवामानविषयक शास्त्रज्ञांची बैठक होते. त्यात कृषी हवामानविषयक सल्ले 16 लाख शेतकऱ्यांना मोबाईलवर पाठविण्यात येतात. आजपर्यंत असे साडे तीन कोटी संदेश पाठविण्यात आले आहेत. प्रकाशनामध्ये 2007 पासून ऑगस्ट 2014 पर्यंतची सर्व शेतकरी मासिके ऑनलाईन मोफत उपलब्ध करण्यात आली आहेत. नुकतिच ती मोबाईल ऍपच्या स्वरुपातही मोफत उपलब्ध करुन देण्यात आली आहे. नवीन संकेतस्थळ बनविण्याचे काम सुरु असून त्यात ऍग्रोवनमार्फत मांडण्यात आलेल्या सुचनांचा विचार करण्यात येणार असल्याचे कृषी आयुक्तालयाच्या प्रकल्प शाखेमार्फत कळविण्यात आली आहे.
-------------