औरंगाबाद - कापूस देशी वाण प्रात्यक्षिक भेट

औरंगाबाद (प्रतिनिधी) ः वसंतराव नाईक मराठवाडा कृषी विद्यापीठाअंतर्गत कापूस संशोधन केंद्र नांदेडमार्फत देवगाव (ता. पैठण) येथे घेण्यात आलेल्या विद्यापीठाच्या देशी कपाशी वाणाच्या पिक प्रात्यक्षिकास विद्यापीठ शास्त्रज्ञ, कृषी विभागाचे अधिकारी व शेतकरी यांनी नुकतिच संयुक्त भेट दिली.

कुलगुरु डॉ. बी. वेंकटेश्‍वरलू, संशोधन संचालक डॉ. दत्तप्रसाद वासकर, शिक्षण संचालक डॉ. बी. बी. भोसले, विभागिय कृषी सहसंचालक जर्नादन जाधव, सहयोगी संचालक डॉ. सुर्यकांत पवार, जिल्हा अधिक्षक कृषी अधिकारी पी. डी. लोणारे, कापूस संशोधन केंद्राचे कापुस विशेषज्ञ डॉ. के. एस. बेग, शास्त्रज्ञ व शेतकरी यावेळी उपस्थित होते.

औरंगाबाद येथिल कृषी विज्ञान केंद्राच्या मार्गदर्शनाखाली येथिल जय जवान जय किसान शेतकरी गटातील शेतकरी दिपक जोशी यांच्या शेतावरील पी.ए. 255 (परभणी तुराब) आणि पी.ए. 528 या वाणांची यावेळी पहाणी करण्यात आली. देशी (गावरान) कपाशीचे सरळवाण रस शोषक किडींना सहनशिल असल्याने त्यावर होणारा पिक संरक्षणाचा खर्च कमी करता येईल. तसेच मध्यम हलक्‍या जमिनीतीत कोरडावाहू लागवडीत कपाशीच्या देशी वाणांचे बी.टी. कपाशीपेक्षा कमी खर्चात समान उत्पादन येत असल्यामुळे या बियाण्याची उपलब्धता वाढविण्याची आवश्‍यकता असल्याचे डॉ. वेंकटेश्‍वरलू यांनी यावेळी सांगितले.

विद्यापीठाचे हे देशी वाण तसेच अमेरिकन कपाशीचा एन एच 615 या सरळवाणाचे पैदासकार बिजोत्पादन कृषी विद्यापीठाच्या प्रक्षेत्रावर घेण्यात आल्याची माहीती डॉ. वासकर यांनी यावेळी दिली. सरळ वाणाच्या प्रात्यक्षिकांच्या संख्येत व क्षेत्रात वाढ करण्याची गरज डॉ. भोसले यांनी व्यक्त केली. सरळवाणांच्या कापसाला अन्य कपाशीप्रमाणेच भाव मिळतो असा खुलासा डॉ. बेग यांनी केला. कृषी विज्ञान केंद्राचे डॉ. के. के. झाडे व रामेश्‍वर ठोंबरे यांनी ही माहिती दिली.
--------------------