इलेक्‍शन विलेक्‍शन - गोंधळ

आई अंबे तुळजाभवानी ऽऽऽ
निवडणूक आयोगानं इलेक्‍शनचा घट मांडला आहे.
प्रतिमा पुजन, हळदी कुंकू वाहून झालेलं आहे.
हळकुंड, बदाम, पानं, सुपारी खोबरं,
पाच उसाचा फड उभारुन झालेला आहे.
प्रचाराचा नारळ फुटलेला आहे.
हमरा तुमरीला सुरवात झाली आहे...

आई उदे ऽऽऽ

गोंधळ मांडीया गोंधळा ये...
इलेक्‍शनचा विलेक्‍शन गोंधळ मांडीला गोंधळा ये...

कोटी कोटी जनता, हजारभर उमेदवार
288 जागांच्या गोंधळा या...

दिल्लीच्या दिल्लीश्‍वरा गोंधळा ये...
मुंबईच्या मुम्बेश्‍वरा गोंधळा ये...
उद्धवा, राजोबा गोंधळा या...
कोकणच्या राणोबा गोंधळा ये...
सातारच्या महाराजा गोंधळा ये...
सांगली सोलापूर कोल्हापूर पाटलानु गोंधळा या...
पुण्याच्या पवारांनु गोंधळा या...
नाशिकच्या न्यानोबा गोंधळा ये...
मराठवाड्याच्या देशमुखा गोंधळा ये...
विदर्भाच्या देवेंद्रा गोंधळा ये...

चव्हाण, शिंदे, कदम.. मुंडे, खडसे, भोसले..
बिऱ्हाड घरदार.. पालं झोपड्या.. वाडे राजवाडे गोंधळा या...
गोंधळ मांडीला गोंधळा ये...

काकांनो, पुतण्यांनो, भावांनो, बहिणींनो
मातांना, दादांनो, आप्पांनो, भाऊंनो गोंधळा या...
गोंधळ मांडीला गोंधळा या...

मतपेटीच्या राजा तू गोंधळा ये...
लाख मोलाचं मत तुझं दान करण्या ये...
15 ऑक्‍टोबरच्या गोंधळा ये...
लोकशाहीचा गोंधळ मांडीला गोंधळा ये...

विकासाचा अनुशेष घ्यायला ये...
100 दिवसाचा हिशेब मागाया ये...
कांदं, बटाटं, डाळिंब, तुर, मका, सोया
उसा कापसाचं भविष्य ठरवाया ये...
गोंधळ मांडीला गोंधळा ये...

शेतकऱ्याच्या पोरा तू गोंधळा ये...
रानात राबत्या माऊली तू गोंधळा ये...
गाई, म्हशी, शेरडं.. मेंढरं, वासरं, कोंबडं...
जोगवून सारी तू गोंधळा ये...

मजुरी, सावडी, खंडकरी.. वाटेकरी, पाटकरी गोंधळा या...
गोंधळ मांडीला गोंधळा या...

जात पात धर्म पंथ भेद विसरा रे सारे
विकासाच्या मुद्‌द्‌यावर गोंधळा या..
खरीपाची वाट, रब्बीची पहाट
तांबडं फुटायच्या बेतानं या...
गोंधळ मांडीला गोंधळा या...

स. दा. बिनकामे
---------