कृषी परिषद महासंचालक - डाॅ. एम. एच सावंत बलात्कार प्रकरण

कृषी परिषदेचा महासंचालक
सावंतला पोलिस कोठडी

अल्पवयीन मुलींवर बलात्कार प्रकरण

पुणे (प्रतिनिधी) ः अल्पवयीन शालेय मुलींचे लैंगिक शोषण व बलात्कार केल्याप्रकरणी महाराष्ट्र राज्य कृषी शिक्षण व संशोधन परिषदेचे (कृषी परिषद) महासंचालक एच. एम. सावंत याला सिंहगड रस्ता पोलिसांनी गुरुवारी रात्री अटक केली. शुक्रवारी दुपारी त्याला शिवाजीनगर न्यायालयात सादर करण्यात आले असताना मनसेच्या महिला नगरसेविकांनी त्याला चपलांचा हार घालून निषेध केला. न्यायालयाने त्याला 30 मार्चपर्यंत पोलिस कोठडी दिली आहे.

आरोपी मारुती हरी सावंत (वय 58) याचे कुटुंब शिवाजीनगर येथे वास्तव्यास असून, तो दोन वर्षांपासून सिंहगड रस्त्यावरील फ्लॅटमध्ये एकटाच राहत होता. इमारतीच्या आवारात खेळणाऱ्या दुसरीतील दोन आणि तिसरी व सातवीतील प्रत्येकी एक अशा चार मुलींचे तो लैंगिक शोषण करत होता. मुलींना खाऊचे किंवा पैशाचे आमिष दाखवून तो घरात बोलावत असे. त्यांना मोबाईल आणि संगणकावर अश्‍लील चित्रफीत दाखवत असे, अशी माहिती पोलिसांनी दिली.

पीडित मुलींनी शाळेतील समुपदेशक महिलेस त्यांच्यासोबत होत असलेला प्रकार सांगितला. ही बाब तनिष्का महिला व्यासपीठाच्या सदस्यांनी नगरसेवक श्रीकांत जगताप यांना सांगितली. त्यांनी पोलिस ठाण्यात जाऊन घडलेली घटना गंभीर असल्याचे निदर्शनास आणून दिले. पोलिस आयुक्त सतीश माथूर, सह आयुक्त संजय कुमार, सहायक आयुक्त मिलिंद मोहिते, आत्मचरण शिंदे यांच्यासह वरिष्ठ अधिकाऱ्यांनी घटनास्थळी जाऊन कारवाई केली.

मनसेकडून चपलांचा हार
दरम्यान, शुक्रवारी दुपारी आरोपी मारुती सावंत याच्याविरुद्ध महाराष्ट्र नवनिर्माण सेनेच्या अस्मिता शिंदे, रूपाली पाटील, अर्चना कांबळे, संगिता तिकोने, युगंधरा चाकणकर, अनिता दाखवे व आशा साने या महिला नगरसेविकांनी जोरदार निदर्शने केली. सावंत याला न्यायालयात दाखल करताना नगरसेविकांनी त्याला चपलांचा हार घातला. या कृत्याबद्दल सर्व नगरसेविकांना घटनास्थळीच अटक करण्यात आली. सायंकाळपर्यंत त्यांच्यावर गुन्हा नोंदविण्याचे काम सुरू होते.

"तनिष्का' सदस्यांकडून पर्दाफाश
सकाळ माध्यम समूहाच्या तनिष्का व्यासपीठाच्या महिला सदस्यांनी शालेय मुलींवरील लैंगिक अत्याचाराचा हा प्रकार उघडकीस आणला. शाळेतील समुपदेशिका अनुराधा वाघमारे मुलींशी संवाद साधत होत्या. एका मुलीशी बोलताना त्यांना खटकले. त्यांनी तिच्याशी अधिक संवाद साधला. तेव्हा तिने घडलेला प्रकार सांगितला. इतर मुलीही अत्याचाराला बळी पडत असल्याचे सांगितले. तनिष्काच्या समन्वयिका श्रावणी जगताप यांना याबाबतची माहिती दिल्यानंतर त्यांनी मुलींशी संवाद साधला. कोणाला काहीही सांगू नये म्हणून सावंत धमकावत असल्याचे मुलींनी सांगितले. त्यावर जगताप आणि नगरसेवक जगताप यांनी हा प्रकार पोलिसांना सांगितला.


- सावंत निलंबीत

शाळकरी मुलींवर लैंगिक अत्याचार प्रकरणी कृषी परिषदेचे महासंचालक डॉ. एम. एच. सावंत यांना परीषदेच्या सेवेतून तत्काळ निलंबित करण्यात येत असल्याची घोषणा कृषिमंत्री एकनाथ खडसेंनी काल (ता.20) विधानसभेत केली. नाशिकच्या आमदार देवयानी फरांदे यांनी अधिका-याच्या अमानवी कृत्याने मानुसकीला काळीमा फासल्याची भावना व्यक्त करत त्यांच्या निलंबनाची मागणी केली. सर्वपक्षीय सदस्यांनी या मागणीला पाठींबा देत डॉ. सावंत यांच्यावर कठोर कारवाईची मागणी केली. यानंतर कृषीमंत्री खडसे यांनी डॉ. सावंत यांच्यावर तत्काळ निलंबनाची कारवाई करण्यात येत असल्याचे जाहीर केले.

--------