विकास देशमुख यांना उत्कृष्ट जिल्हाधिकारी पुरस्कार

पुणे ः राज्याचे कृषी आयुक्त व तत्कालिन पुणे जिल्हाधिकारी विकास देशमुख यांनी मुख्यमंत्री देवेंद्र फडणविस यांच्या हस्ते राज्य शासनाचा उत्कृष्ट जिल्हाधिकारी पुरस्कार देवून नुकतेच गौरविण्यात आले. महसूल व कृषीमंत्री एकनाथ खडसे व मुख्य सचिव स्वाधिन क्षत्रिय यावेळी उपस्थित होते. नागरी सेवा दिनाच्या औचित्याने मुंबईतील सह्याद्री अतिथिगृहात हा पुरस्कार प्रदान करण्यात आला.

श्री. देशमुख यांनी 2011 ते 2014 या कालावधीत पुण्याचे जिल्हाधिकारी म्हणून नाविन्यपूर्ण उपक्रम राबविले. आर्थिक दुर्बल घटकांना 100 चौरस मीटर जागेत घर बांधणीसाठी आराखडे मंजूरीसाठी नमुना नकाशे मंजूर करण्यातआल्याने गावाच्या सुनियोजित विकासाला चालना मिळाली. हीच योजना आता राज्यभर राबविण्यात येणार आहे.

याशिवाय गौण खनिज कारवाईमध्ये जीपीएस तंत्रज्ञान व टोटल स्टेशन मशीनद्वारे मोजणी करुन शासनाच्या महसूली जमेत मोठी वाढ, अकृषक परवानगीसाठी ऑनलाईन पद्धत, गाव नकाशा प्रमाणे अतिक्रमीत व बंद झालेले पांदणरस्ते खुले करण्याची मोहीम, शासन आपल्या दारी उपक्रमातून प्रमुख गावांमध्ये शिबिर घेवून विविध योजनांचे लाभ वाटप (समाधान योजना), राजस्व अभियान व इतर योजनांची प्रभावी अंमलबजावणी या उल्लेखनिय कार्यासाठी त्यांना हा पुरस्कार देण्यात आला आहे.
-----------